Астанада 2026 жылдың 11-12 шілде күндері ұлттық мәдениет пен қазақтың дәстүрлі тағамдарын дәріптейтін BaiQymyz-2026 халықаралық гастрономиялық фестивалі ұйымдастырылды. Екі күнге созылған ауқымды іс-шара аясында ел эстрадасының танымал жұлдыздарының қатысуымен концерттер өтіп, ұлттық ат спортының кең бағдарламасы көпшілікке ұсынылды.
Астана қаласы әкімдігінің ресми сайтының мәліметінше, бұл шара оқиғалық туризмді дамытуға бағытталған және Туризм және спорт министрлігі бекіткен Республикалық туристік іс-шаралар күнтізбесінің зәкірлік оқиғаларының қатарына кіреді. Фестивальдің басты ерекшелігі ретінде келушілерге 56 тонна қымыз ұсынылды.
Фестивальдің әр күні еліміздің танымал өнер иелерінің қатысуымен өткен гала-концертпен қорытындыланды. Келушілер Sadraddin, Қазыбек Құрайыш, Ғазизхан Шекербек, «Тұран» этно-фольклорлық ансамблі, Жұбаныш Жексен, Қайрат Баекенов пен «Format» тобы, Қыдырәлі Болманов және Қарақат Әбілдина сияқты орындаушылар мен шығармашылық ұжымдардың концертін тамашалады. Сонымен қатар, алаңда суретшілер мен қолөнершілердің арнайы көрмелері ұйымдастырылып, қонақтар қазақ халқының салт-дәстүрі, қолөнері және мәдениетімен жақынырақ танысуға мүмкіндік алды.
Фестивальдің спорттық бөлігі Астана қаласындағы «Арғымақ» ат спорты кешенінде ASIA KOKPAR LEAGUE мен ER QANATY бірлестіктерінің ұйымдастыруымен өтті. Шарада дәстүрлі ат спорты мәдениеті мен заманауи көрермендік форматтар бірыңғай тұжырымдама аясында үйлестірілді.
Бағдарлама шымылдығы ER QANATY арнайы жылқылар шеруімен ашылып, соңынан жекпе-жек аттарының ерекше көрсетілімі мен шабандоздардың кәсіби өнеріне ұласты. ASIA KOKPAR LEAGUE ұйымдастырған тартысты көкпар жарысы мен ұлттық аударыспақ сайысы өтіп, шабандоздардың ептілігі мен шеберлігі паш етілді. Жастардың қызығушылығын арттыру мақсатында алғаш рет дәстүрлі Шөген ойыны мен заманауи форматтағы ат үстіндегі Квиддич ойынының көрсетілімдері ұсынылды.
Фестиваль Астанадағы «Қазанат» ипподромы мен «Арғымақ» кешенінің негізгі алаңдарында отбасылық демалыстың заманауи үлгілерін тоғыстырды. Шараға қатысу билеттер арқылы жүзеге асырылып, келушілерге 1 күнге немесе 2 күнге бірден жарамды билет түрлері ұсынылды. Әлеуметтік қолдау мақсатында зейнеткерлер мен 16 жасқа дейінгі балалардың іс-шараға тегін қатысуы қамтамасыз етілді.