Қазақстан мен Корея Республикасының президенттері Сеулде шағын құрамда келіссөз жүргізді.
Ақорданың баспасөз қызметі хабарлағандай, Мемлекет басшысы Қасым-Жомарт Тоқаев өзін сапармен шақырғаны үшін Корея Президенті Юн Сок Ёльге ризашылығын білдірді. Кездесу барысында Қасым-Жомарт Тоқаев Корея Республикасы Қазақстанның маңызды стратегиялық серіктесі екенін, екі елді тамыры терең достық, өзара түсіністік және тығыз мәдени-гуманитарлық байланыстар біріктіретінін атап өтті. Сапар аясында өткен ауқымды бизнес-форумның нәтижесінде жалпы құны 19 миллиард долларды құрайтын коммерциялық келісімдерге қол қойылды. Сондай-ақ қонақүй желілерін, мұнай өңдеу зауытын салу және қала құрылысы, оның ішінде «Alatau City» жобасын одан әрі дамыту мәселелері кеңінен талқыланды. Президент бұл жобаға мемлекет тарапынан үлкен мән беріліп отырғанын және жаңа Конституциялық нормалар негізінде кореялық инвесторларға заң жүзінде толық кепілдік берілетінін жеткізді.
Сонымен қатар Мемлекет басшысы Қазақстанда тұратын 120 мыңнан астам корей диаспорасының қоғамдағы белсенді рөліне тоқталып, екі ел арасындағы тарихи байланыстарды тілге тиек етті. Атап айтқанда, корей халқының қаһарманы, генерал Хон Бом Доның сүйегін тарихи отанына қайтару арқылы Қазақстан өзінің азаматтық парызын абыроймен орындағанын еске салды.
Өз кезегінде Корея Республикасының Президенті Юн Сок Ёль Қазақстан басшысының Сеулге жасаған сапарына айрықша мән беретінін жеткізіп, ілтипат білдірді. Ол қиын-қыстау кезеңде жер аударылған корей халқына пана болған қазақ еліне және ұлт батыры Хон Бом Доның сүйегін елге қайтару жөніндегі тарихи шешімі үшін Қасым-Жомарт Тоқаевқа арнайы алғыс айтты.
Келіссөз қорытындысы бойынша екі ел басшылары өзара жан-жақты қолдауды жалғастырып, Қазақстан мен Корея Республикасы арасындағы стратегиялық серіктестікті одан әрі нығайтуға және оны жаңа әрі нақты мазмұнмен толықтыруға ниетті екендерін растады.